راديو سما

بدأت أتغير

أضيف بتاريخ ٠١/٢٩/٢٠١٩
RadioSama

هحكى قصتي عن البداية الجديدة ..

انا متخرجة من سنة وزي ما احنا عارفين طبعا مفيش شغل بالساهل لازم تدور كتير و تعافر وكدا، انا قعدت كتير ادور وملقتش حاجة مناسبة، بعد فترة لقيت حاجة مناسبة مختلفة تماما على اللى درسته ومبسوطة فيها اتعلمت كتير وغلطت كتير بس استفدت، انا السنة دى اتعرفت علي ناس جديدة و مبسوطة انهم في حياتي، خسرت ناس بس كسبت ناس تانية .. الناس بتخاف من اي حاجة جديدة، في مقولة قرتها بتقول: “الخوف لا يمنع من الموت ولكنه يمنع من الحياة” نجيب محفوظ

الناس بتخاف من البديات .. بتخاف تفشل فيتقال عليك فاشل، خبرتي القليلة فى الشغل علمتنى كتير، انك تعرف تهزر و تضحك رغم المشاكل و الظروف ودى حاجة صعبة، اتعلمت برضو اني استحمل، ربنا هيحطك في ظروف و هو عارف انك قدها و هتستحمل، هتبقى متألم و تعبان بس هو هيمشى معاك السكة دى..

من ضمن البداية الجديدة انك تبقى اخدت خبرة من الماضى، انا بدايتى الجديدة انى نزلت اشتعل اه كنت خايفة اعمل حاجة غلط و الناس هتتقبلنى و لا لأ !

بس الدنيا بقيت تمام، من تجربتي برضو انى بحاول اعمل حاجة جديدة فى حياتى ميبقاش مجرد روتين، قررت انه اشتغل على نفسى واشوف بعرف اعمل اية و اعمله،  البداية الجديدة انك تقف و تشوف اية اللى محتاج اغيرة، طريقتى مع اهلى مع اصحابى، من تجربتى برضو ان ربنا معايا فى كل خطوة، البداية الجديدة صعبة بس اللى عايز يتغير بجد هيبتدى من جديد..

أستر جون